إعمل الصح - Do the Right thing

بوست من حملة السنة اللي فاتت ماكنتش ناوية انزله دلوقتي
بس اكتشفت انه ضروري ينزل وفي التوقيت ده بالذات
---------------------------------------------------------------
اعمل الصح
لا والله ما بقلش .. بتكلم جد

اول ما شهر مارس بدأ ورغم اني كنت ناوية من قبلها موضوع التوعية ده
سألت نفسي .. هل فعلا صح اني اتكلم عن مرضي وأوعي الناس عنه
من غير ماتكسف اني اقول ان عندي المرض ده؟
(بطانة الرحم المهاجرة - endometriosis)

طب انا عندي اكتر من 1.200 فريند في الليستة
وفيه ناس منهم بصراحة ماعرفهمش ومش فاكرة اصلا
مين اللي ضاف التاني وفي أي ظروف
هل فعلا صح اني اتكلم عن تجاربي قدام كل دول؟

وبعدين عندي عدد ولاد ورجالة كتير برضه
معارف مدرسة وشغل وجامعة وغيره
بقابلهم وبشوفهم حتى ولو مش بشكل منتظم
هل فعلا صح اني اتكلم عن مرضي النسائي قدامهم؟

وبعدين لقيت نفسي بسأل سؤال تاني:
انا الحمد لله عندي علم وكمان قدرة على الترجمة
وعندي خبرتي وتجاربي في سنتين تعاملي مع المرض
هل من الصح اني أخبي ده واكتمه جوايا عشان مش عايزة اسمع "ايااااه عييييب"؟

الاجابة على السؤال الأخير ردت على بقية الاسئلة
طبعا مش صح اني اخفي عن الناس علم ومعلومات ممكن تفيدهم
وافضل محتفظة بيهم لنفسي واتجاهل ان الشهر ده هو شهر التوعية عن المرض

وأكيد مافيهاش حاجة اني اوضح ان انا عندي المرض ده
عشان لو حد عنده سؤال مايتكسفش او يتردد انه يسأل

وايه يعني لما 1.200 واحد/ة يعرفوا ويسمعوا تجاربي
ده انا كمان خليت البوستات دي public عشان اكبر عدد يستفيد

وماعتقدش ابدا اني لازم اتكسف من وجود ذكور على البروفايل عندي
لا حياء في العلم وبعدين ممكن واحد اخته او مراته او بنته مريضة
ومن خلال البوستات يكتشف ده ويوصل لها التوعية
وحتى لو كان من باب الفضول بيسأل فمافيش مشكلة اني اجاوب
طالما ان الموضوع لم يتجاوز حدود الادب والاحترام
وأحب أحيي شاب بعينه بيساعدني من نفسه في نشر التوعية دي

أوعى تخاف او تتكسف انك تعمل حاجة انت واثق ومتأكد انها صح
أوعى تخبي وتداري علمك وتحتفظ بيه لنفسك عشان خايف الناس هتقول ايه
أوعى تخلي اللي حواليك هم اللي يحددولك تعمل ايه وماتعملش ايه
استفتي قلبك في كل حاجة بتعملها لأن قلبك هو بوصلتك
وطالما ما بتأذيش حد (وبالعكس بتفيد الناس) فكك من أي حد يقولك "بلاش"
امشي بدماغك
واعمل الصح

Leave a Reply